كتب الشاعر محمد مرعى
جانى ابويا فى المنام…
اتفرد جنبى ونام
قالي فينك يابن ضهري
حتي مستخسر زيارة؟؟؟
قلتله في الدنيا يابا
قالي دنيتكم خسارة
قلتله مطحون يابويا فى الرحايا
بجري جري الوحش فيها
من صباحي ولمساية
قاللي يابني عيش حياتك…
ارض ربك وارض ذاتك
قاللي اسألني انا
مش هينفعك الا عملك
اعمل الصالح تملي
زكي يابنى
صوم وصلي
خلي حسناتك تعلي
خلي ذكر الله تملي فوق لسانك
ادعي يابني فى كل لحظة
مش عشاني …..لأ عشانك
ده الدعا هيعلي شانك
ما تلمس ايدك حرام
ولا يدخل جيبك حرام
بالحرام يابني بتضيق القبور
قلتله ويش حاله قبرك؟
قاللي يابني كله نور
قد ايه ربك رحيم
قد ايه ربك غفور
كنت رايح له وشايل
فوق كتافى الف ذنب
بس كان جوايا قلب
ماعرفش الا يحب
ربنا رحمته اوسع
مما يتصور خيالك
ابتسمت فى ضي وشه
وقولتله دي مكتوبالك
ذدني يابا فى النصيحة
قاللي هاقولها لك صريحة
اوعي يابني فى مرة
تظلم
او تكون أداة لظالم
وانصف المظلوم تملي
خلي قلبك بيت مظالم
خلي يابني البال من امك
زيها مايشلش همك
فى رضاها السعد يابني
مهما تعلي ولا تبني
خلي بالك من ولادك
هما دول مالك و زادك
هما دولة امتدادك
قلتله نفسي اجيلك
قالي كل شئ يابني بأوان
كل واحد له أوانه
بالمكان وبالزمان
قمت بايسه فوق جبينه
ولمست بشوق عيونه
وصحيت م النوم بفرحة
شفت ابويا في المنام
من حلاوة الحلم نفسي
كل مااقوم تاني ….انام
تحياتي
الشاعر محمد مرعى
