بقلم : المستشارة د.أميرة صلاح الدين
من الاخر كده كلنا بنبقى محتاجيين ناس حلوة فى حياتنا مش حلاوة شكل بس لا الموضوع اننا محتاجين ناس بجد :-
. ناس تغير علينا مش مننا وتخاف علينا مش مننا .
. ناس تدفعنا للامام و تأخد بأيدينا إذا وقعنا أو لاقدر الله الأيام جت علينا .
. ناس بتفرح اوى بنجاحنا وبتحس بفخر لانهم واثقيين ان راحتنا النفسية اللى هما السبب فيها هى اللى خلتنا نعرف ننجح .
. ناس تتقبلنا زى ماحنا كده بكل اللى فينا من صعوبات و أى ظروف فى حياتنا و تكون فخورة بينا اى وقت حتى اذا تعبنا او كان فى يوم شكلنا مش تمام .
. ناس عندهم الصراحة معانا احنا بالذات مبدء اما يزعلوا يقولوا زعلانين ويسمعونا اما نوحشهم يقولوا وحشتونا اما يحسوا بأى احساس حلو يصارحوا به.
. ناس اذا فرض و زعلناهم بدون قصد يتقبلوا اعتذرنا بدون فرهدة من كتر الإعتذار .
. ناس بيشوفوا ان ضعفهم أمامنا هو قمة القوه ويكونوا واثقين ان ضعفهم ده مافيش حد فى الكون هيشوفوا غيرنا ولا عمرنا هانذل بعض به .
. ناس عمرنا ما نتكسف نتعب قدامهم نخرف اذا حرارتنا ارتفعت امامهم .
. ناس شايفة الحنية اللى وراء عصبيتنا احيانا اما الدنيا بتيجى علينا.
. ناس بتحس اننا فى الوقت ده غيرينين عليهم حتى اذا لسبب تافهه و بيجروا علينا ويقولولنا اطمنوا انتم عندنا بالدنيا ومش شايفيين غيركم .
. ناس اذا خانتنا الكلمات بيلتزموا الصمت فى نقاش على الكلام اللى قولناه لكن مش بيلتزموا الخصام لحد ما نتناقش و نوضح اللى نقصده .
. ناس عارفة أهمية خد وهات فى المعاملة مش خد بس او هات بس .
. ناس لايمكن نبطل سؤال على بعض حتى اذا متخصمين لان مبدئنا واحد خصامنا مش معناه فراق .
. ناس يحسسونا اننا عندهم رقم 1 فى حياتهم مهما كانت مشاغلهم .
. ناس دائما يفكرونا ان الدنيا وقتها مش كفاية بالنسبة لقربنا لبعض و ان الجنة هى اللى هنفضل فيها مع بعض للنهاية و يتعهدوا معانا اننا نعمل كل خير سوا علشان نكون فى نقس المرتبه فى الجنه ونكون مع بعض فى الحياه الباقية الخالده .
. ناس تبقى كل مره بيكلمونا فيها بجمال اول مره .
. ناس يحسوا بغيابنا اذا اتأخرنا فى سؤالنا عليهم لدقايق ويحسوا ان الدنيا فاضية من غيرنا
. ناس يحبونا بجد ويفرق معاهم وجودنا و يتألموا أوى من غيابنا
من الاخر احنا محتاجين ناس محتاجينا وفارقيين معاهم اوى زى ماهما فارقيين معانا .
نصيحة بقى اذا عندك من الناس دى حبيب صديق صاحب جار قريب اوعى تفرط فيه علشان الناس دى حلوة بجد و بجد صعب تتعوض .
ربنا يرزقنا بالناس الحلوة دى و يفضلوا معانا على طول الناس اللى تعطينا الحب و الإهتمام بدون مانطلب بدون مقابل علشان نحس ان طعمه أحلى ، على فكره الحب يُمنح ولا يُطلب .. والإهتمام يُفرض ولا يُمنح ، الثاني يكبر وإن لم يرافقه الأول ؛ والأول يموت حين يبتعد الثاني .
لكن مع كل الأمنيات الرقيقة الطيبة اننا نقابل الناس الحلوة اوى دى خلينا على يقين اننا لازم نكون إحنا اولا و اخرا مثال حى للصفات دى او على الأقل نحاول نكون كده علشان نلاقى اللى كده متابعينى الكرام أهديتكم كلماتى من قلبى داعية الله عز وجل ان تدخل قلوبكم بمجرد رؤيتها و ان ينعم علينا الله تعالى ان نكون بهذه الصفات الجميلة و ان يرزقنا بالناس الحلوة دى امين يارب العالمين
