بقلم/ميرنا حسن
عالم الموضه مش بس هدوم معموله بإتقان ولا أقمشه فاخره ولا صيحات بتتغير كل موسم عالم الموضه في عمقه الحقيقي هو خيط صغير جدا بيقلب حكاية الإنسان من شكل لشكل ومن حضور لحضور من غير ما يغير جوهره ومن غير ما يجبره يبقى نسخه من حد تاني الموضه الحقيقيه مش اتباع هي اكتشاف بطيء ومستمر لما يناسبك انت مش اللي يناسب السوق ولا الناس
اللبس ساعات بيكون صرخه هاديه بتقول انا مختلف وساعات بيكون سكون ناعم بيرجعلك نفسك من غير ما حد يحس وساعات تانيه بيكون درع خفيف بيحميك من نظرات العالم واللي مش فاهم ده غالبا فاهم الموضه غلط لأن الموضه مش سباق الموضه تجربه شخصيه مافيهاش نسخ متطابقه
الست اول ما تمسك قطعه لبس وتحطها على جسمها قبل ما تبص على المرايا بتحس لو القطعه دي منها ولا غريبه عن روحها كأن فيه حاجه جوه بتعرف المدى اللي اللون يقدر يدعمها فيه والوسع اللي ممكن يخليها تتحرك براحتها والنقشه اللي تحسسها انها واقفه على أرض مش بتتزحلق الموضه إحساس قبل ما تكون شكل
واللي ما يعرفهوش كتير إن كل قطعه لبس بتتلبس بتغير حاجه داخليه مش ظاهريه بس كم واسع يشيل توتر عن الكتف جيب صغير يديك إحساس بالراحه وانت حاطط فيه سر صغير ليك بس بنطلون مظبوط المقاس يخلي وقفتك أهدى وأثبت وتنوره خفيفه تخلي خطواتك أرق وأكتر حريه كل التفاصيل دي بتأثر فيك من غير ما تنطق بكلمه
وعالم الموضه ما هواش عالم للرفاهيه زي ما ناس كتير فاكره هو عالم للمساحه الشخصيه اللي كل واحد بيخلقها لنفسه وسط الزحمه عالم بيخليك تحس إنك صاحب قرار في شكلك حتى لو يومك كله مش في إيدك عالم بيعيد تعريف وجودك قدام الناس وقدام نفسك
الناس اللي بتلبس بوعي مش هي الناس اللي عندها هدوم غاليه الناس اللي بتلبس بوعي هي اللي شايفه نفسها في كل قطعه مش بتتخبى وراها ولا بتحاربها ولا بتحولها قناع هي بتخليها امتداد لشخصيتها وده سر الموضه اللي ما حدش يقدر يقلده
وفي الآخر يبقى الخيط اللي بيقلب الحكاية خيط بسيط جدا بس قادر يشيل يوم كامل من التعب ويبدله بثقه قادر يحول شكل عادي لحضور قوي وقادر يطلع من داخل الإنسان نسخه مش أحلى بس نسخه أصدق نسخه قادرة تكمل يومها وهي فاهمه إن الموضه مش لبس الموضه قصه بتتكتب كل صباح على جسم الإنسان قبل ما يشوفه أي حد
