صرخة اب مقهور

بقلم المستشار / محمد الفهد

– اللي مايصرفش على عياله يبقى نطع وعديم الرجولة.
• صح يا أستاذة.

– ولما هو صح.. مابتصرفش على عيالك ليه يا استاذ 😒
• هو انا عندي عيال ؟؟

– مش انت كنت متجوز وعندك ولد وبنت.. انت هتمثل عليا

• آه تقصدي عيال على الورق.. منا بدفع النفقة كل شهر

– انت بتسمي النفقة دي فلوس .. كفى بالمرء إثماً أن يضيع من يعول.. اتقوا الله يا ذكووووور
• طب بصي بقى 👇

* ابني اللي لازم ارفع قضية عشان اشوفه 3 ساعات ف الأسبوع في مكان شبه السجن.. ده لو الهانم جت.. ولازم كل مرة خناقة وشتيمة وبهدلة.. وتقوله تف على بابا واشتمه

* ابني اللي مليش حق اعرف حاجة عن تعليمه ولا اختار مدرسته ولا اقدر اروح اسأل المدرسين عنه..

* ولا تقصدي ابني اللي لو حد زعله في المدرسة مش هعرف اروح اسنده واكبره واجيبله حقه.. واصحابه يعايروه انه معندوش بابا زيهم..

* ولا ابني اللي معرفش اربيه واعلمه الصح واكافئه لما يعمل حاجة صح واعاقبه لما يغلط

* ابني اللي مش عارف ابقى جنبه في سن المراهقة واعلمه يبقى راجل.. اقفشه ريحته سجاير واعرفه مخاطرها وابعده عنها..

* ابني اللي مش عارف افطر معاه يوم في رمضان ولا عمري شوفته في العيد.. ولا يعرف حد من اهله ابوه

* طب تقصدي بنتي اللي بتكبر بعيد عن عيني وبسمع ان البنت بتكون روحها في أبوها بس هي شاربة كُرهي ومابتحبش تشوفني برغم اني هموت واخدها في حضني.

* ولا بنتي اللي مش من حقي اعترض على لبسها لو مش محترم.. ولا اعترض على تأخيرها برة البيت.. ولا من حقي اقبل أو ارفض عريسها لو هتتجوز ولا هتاخد رأيي أصلاً..

** ابني وبنتي اللي هيرفعوا عليا قضايا نفقات وأجور وياخدوا ضدي أحكام بالحبس لو اتأخرت في السداد.. لا عمرهم سألوا عني ولا يعرفوا أخباري ولو مت بكرة محدش فيهم هيحضر جنازتي.. هما دول عيالي؟؟

• انا بالنسبة لهم كارت فيزا مش أكتر.. امهم اختارت طريق المحاكم ورفضت اني اشوفهم بالود.. فانا ملتزم بحكم المحكمة في النفقة ولو أطول مدفعش خالص مش هدفع..

• عايزين تمشوا بالدين، فالدين اللي فرض النفقة على الأب للعيال فرض بر الوالدين عليهم.. فرض صلة الرحم عليهم..
(أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ).
• أو تمشوا بالقانون فتخرسوا خالص وتكتفوا بحكم القانون ومسمعش صوت واحدة قاطعة أرحام كل شوية تقول آية
أو حديث وعاملة نفسها مظلومة وهي ظالمة عيالها اكتر من ابوهم وبتتاجر بيهم

والي يقولك ابعت لبس العيد لعيالك ملهمش ذنب 😅

الناشز تحرم الاب من عياله طول السنه و٣٠ يوم رمضان
وتيجي علي العيد بكل بجاحه وتدليس وتقولك مبيصرفش
وتتهم الاب بالتقصير علشان تشغل الكل عن نشوزها وقطع الرحم