بقلم/نشأت البسيوني
في أوقات معينة القلب يقرر يتحرك قبل العقل يتحرك فجأة من غير استئذان من غير ما يديك فرصة ترتب أفكارك أو تجهز ردودك أو تخطط لأي حاجة وتحس إنك قدام موجة جديدة موجة مش عارف هتوصلّك لفين لكنك حاسس إنها مهمة وإن تجاهلها هيجرّك لندم أطول
القلب لما يتحرك مش بيطلب ضمانات ولا بيسأل هي الدنيا هتتعدل ولا لأ هو يتحرك لأنه شاف حاجة ما حدش شافها حس بإشارة بسيطة براقت من بعيد لمحت له طريق مختلف باب جديد معنى ناقص كان مستنيه
ومع التحرك ده تبدأ حياة جديدة نوع من النبض يخليك تصحى من جواك يخليك تفوق للي كنت غافل عنه يخليك تشوف إنك كنت ماشي فوق أرض ثابتة بس من غير روح وإن الخطوات اللي كنت بتاخدها كانت مجرد حركة مش حياة
ولما القلب يتحرك بتبدأ تغير أولوياتك تتخلى عن ناس كانوا مجرد عبء وتتمسك بناس كانوا من بعيد سند وتتوقف عن الركض ورا اللي ما يستاهلش وتتقدم بخطوات بسيطة لكنها صادقة وأصلية
ومع كل شعور جديد يتولد جواك تفهم إن القلب مش عدوك زي ما كنت فاكر وإنه مش بيجرك لمشاكل بالعكس ده أحيانًا بيحميك من نفسك من اختيار غلط من علاقة ناقصة من استمرار كان هيهدمك أكتر ما يبنيك
تدرك إن أجمل لحظات حياتك كانت لما سمعت صوت قلبك من غير خوف ولما مشيت وراه رغم إن عقلك كان بيحسب ألف احتمال لأن القلب وقتها كان أبصر كان أنقى وكان أصدق
