صدى الأخبار
(شعر الاعلامي فهمي سرحان مقدم برنامج ماوراء الحدث)
#أنا ابن مصر ابن البلد ابن الغلابة الطيبين..
ابن اللي زارع واللي صانع
ابن الكنايس والجوامع
.ابن الغني وابن الفقير
ابن القلوب الطيبة والايدين العرقانين
.. انا بسمة حلوة بتترسم علي وشوش الشقيانين ..
أنا دمعة نازله بتشتكي كل العيون المظلومين .
أنا طير صغير لسه بتعلم اطير .
أنا زرع أخضر في أرض عطشانه حنين ..
انا غنوة مش راح تتنسي عايشه علي مر السنين
أنا شجره عالية وضلها فرشة لكل التعبانين .
أنا مركبة امن وسلام أنا طوق نجاه للغرقانين ..
أنا بابي مفتوح للي تايه ونهر نيل للعطشانين ..
انا ابن مصر ابن البلد لكن انت مين ..
…….. …… …..
انا بدله ميري مموهه علي الحدود ساعة الاذان .
فطرت رصاص والميه في أديّا الشمال والتمر في أديا اليمين ..
أنا لبس زيتي في قطر حربي واسمي حربي
تصريحي كان من غير رجوع
وكفني كان في فلسطين …..
….. ….. …
أنا اللي صورتي علي الحيطان ..
وفي الشوارع والمدارس
وكل حي أو ميدان ..
انا اللي صورتي علي الحيطان
. وفي المدارس والشوارع
أنا الجرس انا الاذان ..
أنا دمي هز المزلقان صحا الشوارع والميدان .
من الصعيد لبورسعيد انا مصري حر ومش جبان ..
انا صحرا عاش فيها الامان ..
طرحت ربيع طرحت ريحان ..
بأبني واعمر من زمان
وعرقي نيل يروي الغيطان ..
انا سد عالي مالوش بيبان
. وايد قويه علي اللي خان .
من غير غرور انا كل دول
. انا مصري حر ومش جبان .
انا ابن مصر ابن البلد ابن الغلابه الطيبين
.انا ابن مصر ابن البلد لكن انت مين
